جاھاندىق باسەكەگە قابىلەتتىلىكتى ارتتىرۋ, ءبىلىم جانە عىلىم ارقىلى ايقىن ماقسات قالىپتاستىرۋ مەن وعان جەتۋ بۇگىندە اسا ماڭىزدى بولىپ وتىر. جىل وتكەن سايىن ءبىلىم سالاسىنا دەگەن تالاپ تا جوعارىلاپ كەلەدى.
ءبىلىمدى ۇرپاق قالىپتاستىرۋ ءۇشىن مەملەكەت تاراپىنان دا ءتيىستى كوڭىل بولىنۋدە. وڭىرلەردە جىل سايىن جاڭا مەكتەپتەر پايدالانۋعا بەرىلۋدە. زاماناۋي تەحنولوگيالارمەن جابدىقتالعان ءبىلىم وشاقتارى وقۋشىلاردىڭ ساپالى ءبىلىم الۋىنا دا جاعداي جاسايدى. دەي تۇرعانمەن, كەيبىر اۋىلداردا اپاتتى جاعدايداعى مەكتەپتەر ءالى دە بارشىلىق.
جامبىل وبلىسىندا بۇگىندە اپاتتى دەپ تانىلعان 5 مەكتەپ بار. قورداي اۋدانىنىڭ سوعاندى اۋىلىنداعى №33, كوكتوبە اۋىلىنداعى №40 جانە كۇنباتىس اۋىلىنداعى №11 نەگىزگى مەكتەپتەر اپاتتى جاعدايدا. سونداي-اق تالاس اۋدانىنىڭ قاسقابۇلاق اۋىلىنداعى قاسقابۇلاق ورتا مەكتەبى مەن ت.رىسقۇلوۆ اۋدانىنىڭ جالپاقساز اۋىلىنداعى جالپاقساز باستاۋىش مەكتەبى دە اپاتتى دەپ تانىلعان. بارلىق ماسەلەنى ءبىر كۇندە شەشۋ مۇمكىن ەمەس, دەگەنمەن دە مۇنىڭ ءبارى اتا-انالار مەن وقۋشىلاردىڭ الاڭداۋشىلىعىن تۋدىرماي قويمايدى. ونىڭ ۇستىنە بيىل اۋليەاتا وڭىرىندە سوڭعى جارتى عاسىردا بولماعان قىس بولدى. سول كەزدەرى مويىنقۇم اۋدانىنىڭ ءبىراز اۋىلدارىنداعى مەكتەپتەردە ساباق توقتاتىلدى. ال وسىنداي كەزدە اپاتتى مەكتەپتە وقىپ جاتقان بالالاردىڭ جايىن ەلەستەتۋ قيىن.
وبلىستىق ءبىلىم باسقارماسى باسشىسىنىڭ ورىنباسارى ءجاميلا بەكباتىروۆانىڭ ايتۋىنشا, اپاتتى مەكتەپتەردى جويۋ ءۇشىن ءتيىستى جۇمىستار جۇرگىزىلىپ جاتىر. ناقتى ايتساق, قورداي اۋدانىنىڭ سوعاندى جانە كوكتوبە اۋىلدارىنداعى ارقايسىسى 50 ورىندىق نەگىزگى مەكتەپتەر مەن تالاس اۋدانىنىڭ قاسقابۇلاق اۋىلىنداعى 120 ورىندىق قاسقابۇلاق ورتا مەكتەبىنىڭ قۇرىلىسى اعىمداعى جىلى اياقتالادى دەپ جوسپارلانۋدا.
اتالعان 3 مەكتەپتىڭ قۇرىلىسى بيىل اياقتالعانىمەن, قالعان 2 مەكتەپتىڭ جايى كەيىنگە قالىپ تۇر. ت.رىسقۇلوۆ اۋدانىنىڭ جالپاقساز اۋىلىنداعى جالپاقساز ورتا مەكتەبىنىڭ قۇرىلىسى اعىمداعى جىلى باستالىپ, كەلەسى جىلى اياقتالماق. ال قورداي اۋدانىنىڭ كۇنباتىس اۋىلىنداعى №11 نەگىزگى ورتا مەكتەپتىڭ ماسەلەسى 2019-2020 جىلدارعا قاراي شەشىلمەك. وعان دەيىن وقۋشىلار اپاتتى مەكتەپتەردە ءبىلىم الۋعا ءماجبۇر.
سونىمەن قاتار تاراز قالاسىنداعى №24 جانە №55 ورتا مەكتەپتەر, بايزاق اۋدانى, بايزاق اۋىلىنداعى سىدىق ابلانوۆ اتىنداعى ورتا مەكتەپ پەن اتالعان اۋداننىڭ اقشولاق ستانساسىنداعى اقشولاق ورتا مەكتەپتەرى دە بۇگىندە ءۇش اۋىسىمدا جۇمىس ىستەيتىن مەكتەپتەر قاتارىندا. ءۇش اۋىسىمدا ءبىلىم بەرەتىن 3 مەكتەپتىڭ قۇرىلىسى اعىمداعى جىلى اياقتالسا, اقشولاق ورتا مەكتەبىنىڭ قۇرىلىسى بيىل جەرگىلىكتى بيۋدجەت ەسەبىنەن باستالىپ, كەلەسى جىلى اياقتالادى ەكەن.
وبلىستىق ءبىلىم باسقارماسىنىڭ مالىمەتىندە كورسەتىلگەن دەرەكتەر الداعى ۋاقىتتاردا تولىعىمەن ىسكە اساتىن بولسا, ەكى جىلدان كەيىن وڭىردە اپاتتى دەپ تانىلعان جانە ءۇش اۋىسىمدا ءبىلىم بەرەتىن مەكتەپتەردىڭ ماسەلەسى شەشىلەدى. اۋىلدارداعى ءبىلىم وشاقتارىنىڭ جاي-كۇيى شەشىلگەن جاعدايدا عانا ءبىلىم سالاسىنداعى سەرپىندىلىگىمىز ارتا تۇسپەك.
حاميت ەسامان,
«ەگەمەن قازاقستان»
جامبىل وبلىسى